Me var nyleg på studiebesøk hos to verdsleiande kompetansemiljø innan marin teknikk og energilagring i USA. Det velrennomerte universitetet, Massachusetts Institute of Technology (MIT) i Boston har fleire miljø som arbeider med problemstillingar og fagområder knytt opp til Maritime CleanTech West (MCTW) sine aktivitetar. MCTW har også besøkt University of Texas i Austin, der verdens fremste ekspertar innan kjemisk energilagring fortalde om siste nytt innan batteriteknologi.
I førre veke møtte ei rekke næringsaktørar frå MCTW fleire professorar og forskarar ved institutt for Ocean Engineering ved MIT, som arbeider med bl.a. hydrodynamiske verktøy for design av skip og energisystem offshore. MCTW presentere sine satsingsområder og pågåande utviklingsprosjekt i klynga, og møtte stor interesse for prosjekta hos forskarane hos MIT. Design, framdriftssystem og elektrifisering av fartøy, var sentrale områder der både den norske næringsklynga og MIT ser mulige interesser i vidare samarbeid.
Etter besøket hos MIT i Boston, reiste MCTW til Austin, Texas, og deltok der på årskonferansen til National Alliance for Advanced Battery Technology (NAATBatt). Styreleiar i MCTW, Ingve Sørfonn,haldt eit innlegg der han presenterte ulike innovasjonsprosjekt som pågår iklynga og synleggjorde den maritime marknaden for avanserte energilagringssystem. Styremedlem i MCTW og tidl. direktør ved Fjellstrand, Nils Aadland, deltok i eit debattpanel under konferansen, der han blant anna fortalde om batteriferje-prosjektet til Fjellstrand.
MCTW fekk også møta Dr. John Goodenough,som står bak utviklinga av det moderne oppladbare lithium-ion batteriet som vert bruk bl.a. i PC’ar og mobiltelefonar, men som også blir brukt i maritime applikasjonar. Hans kollega Dr. Arumugam Manthiram viste deltakarane frå MCTW rundt i laboratoria ved University of Texas, der mykje av forsking og utvikling av batteriteknologi skjer. Dr Manthiram var svært interessert i fleire av utviklingsprosjekta til MCTW, som inneheld installasjon og uttesting av store batteri- og ladesystem ombord i operative fartøy.
Vidare samarbeid med desse kompetansemiljøa er av stor interesse for MCTW, og me ser allereie no konkrete områder der ein kan få til gode innovasjonsprosjekt, der dei amerikanske universitetsmiljøa og MCTW samhandlar, seier prosjektleiar i MCTW, Hege Økland.