Noreg er leiande på utvikling av både grøn skipsfart og CCS-teknologi. Kva om det møtest lokalt på skip? Det var tema då me samla klynga på Mongstad i januar.
– 36 milliardar tonn. Det er så mykje CO2 me slepp ut kvart år. Noko må gjerast, seier Torleif Madsen, CEO i Compact Carbon Capture.
Madsen viste fram dei spennande planane til selskapet under NCE Maritime CleanTech og Mohnsenteret sin Tech Update på teknologisenteret på Mongstad – om nettopp karbonfangst- og lagring.
– Det viktigaste som må skje for å få ned utsleppa av klimagassar er ei haldningsendring. Den er me vitne til no. Deretter handlar det om å auka effektiviteten på det me gjer. På toppen av «kransekaka» kjem karbonfangst- og lagring, held Madsen fram.
Hald deg oppdatert med nyheitsbrevet vårt!
Effektivt med g-krefter
Madsen sitt selskap samarbeider med Equinor, Fjell Technology Group, Sintef og CMR Prototech om å laga eit CO2-fangstanlegg lite nok til å få plass om bord på skip.
– Anlegget me jobbar med er mykje mindre og meir effektivt. Me bruker g-krefter i ein slags sentrifuge for å skilja ut CO2 raskare. Det skal også bli skalerbart, slik at anlegget kan lagast tilpassa både staden det skal vera og kor mykje CO2 ein ønskjer å fanga, seier Madsen.
Ifølgje han skal den første demoen stå klart på eit skip allereie i 2022.
– Går alt etter planen er fangstanlegget vårt på marknaden i 2023, seier Madsen.
Skyt CO2 ned i havbotn
Maritime Development Center er blant partnarane i det EU-finansierte decarbonICE-prosjektet. Mikkel Hansen frå den danske næringsklynga var til stades på Mongstad for å fortelja deltakarane i NCE Maritime CleanTech om utviklinga i deira prosjekt.
– Me jobbar saman med store aktørar innan shippingindustrien om mogelege løysingar for å minska utsleppa av CO2, seier Hansen. Blant desse er mellom anna Knutsen OAS og Teekay.
Også i decarbonICE-prosjektet blir det jobba med løysingar som skal få plass om bord på skip.
– Tanken med vårt anlegg er at me fangar CO2, kjøler ned klimagassen og gjer den om til tørris forma som spydspissar. Desse skal skytast nedover, slik at dei blir lagra i havbotnen. På den måten treng ein ikkje tenkja på lagring av CO2 om bord, seier Hansen.
Verdas største
Technology center Mongstad er verdas største og mest fleksible anlegg for testing og forbedring av teknologiar for CO2-fangst. Deltakarane på seminaret fekk også ei omvising på anlegget som har fanga klimagassar sidan 2012.
Geir Grøttveit frå Equinor fortalde deltakarane om Northern Lights – staten sitt store prosjekt for å visa at storskala karbonfangst- og lagring er mogeleg.
Samlinga på Mongstad var eit samarbeid mellom NCE Maritime CleanTech og Mohnsenteret, med støtte frå Vestland fylkeskommune.
Ønskjer du meir informasjon eller har innspel til FoU-aktivitetar knytt til CCS og karbonfangst om bord? Ta kontakt med oss i NCE Maritime CleanTech.
Her er Tech Update-presentasjonane:
- Torleif Madsen, Compact carbon capture
- Geir Grøttveit, Equinor
- Mikkel Hansen, Maritime Development Center / decarbonICE
