Chris Jørgen Rødland er tilsett som ny kommunikasjonsrådgjevar i NCE Maritime CleanTech.
Bergensaren byrja i klyngeadministrasjonen i desember.
– Det er veldig fint å få ta del i eit spennande miljø som er viktig både for Vestlandet, Norge og resten av verda, seier Rødland.
Dei siste to åra har han jobba som kommunikasjonsrådgjevar i Geelmuyden Kiese, med myndigheitskontakt og Kina-relaterte aktivitetar som spesialfelt.
– Eg håpar kombinasjonen av ein kommunikasjonsfagleg bakgrunn og politisk innsikt kan vera med på å løfta tilbodet klyngeadministrasjonen kan gje medlemsbedriftene, seier Rødland.
Politisk aktiv
Rødland har ei mastergrad i samanliknande politikk, med spesialisering i kinesisk politikk og diplomati frå UiB og Chr. Michelsens Institutt. Studiet sikra Rødland utveksling til the Chinese University of Hong Kong og Fudan University. Han fekk også Fritt Ords masterstipend for si masteroppgåve om kinesisk tilstedeværelse i Zambia og konsekvensane frå gjeld og korrupsjon. Rødland har også vore politisk praktikant ved Norges ambassade i Beijing, og praktikant hos Norwegian Business Assosciation i Shanghai.
– Dei siste elleve åra har eg vore aktiv politikar i Høgre, seier Rødland.
I dag er han medlem av bystyret i Bergen. Tidlegare har han jobba som politisk rådgjevar for byutviklingsbyråden i Bergen, vore leiar i Fyllingsdalen Høgre og sommarpraktikant hos Høgres stortingsgruppe.
Stort team
Frå før av jobbar Marie Launes (direktør for samfunnskontakt) og Marius Knutsen (kommunikasjonskonsulent) med kommunikasjon og marknadsføring i NCE Maritime CleanTech.
– Det blir stadig viktigare å synleggjera og dokumentera aktivitetane som pågår i klynga, og kva rammevilkår industrien treng. Marknadsføring og kommunikasjon har i dei siste åra blitt ein spesialitet i NCE Maritime CleanTech. I fleire av dei store EU-prosjekta me er med i, bidreg me ved å fortelja verda om både potensial og framgang for nye grøne løysingar. Chris Jørgen vil bidra i dette arbeidet med både kommunikasjonserfaring og politisk innsikt, seier Marie Launes, direktør for samfunnskontakt i NCE Maritime CleanTech.