NCE Maritime CleanTech er tildelt 1,5 millionar til tidlegfase-prosjekt i klynga. Om du vil ha din del av potten, må du søka innan 29. september.
Kvart år utlyser Innovasjon Norge ut midlar til innovasjonsprosjekt i klynger gjennom ordninga «Innovasjonsrammen». NCE Maritime CleanTech (NCE MCT) fekk i år tildelt 1,5 millionar frå denne ordninga, og desse skal no fordelast av klyngeadministrasjonen.
Målet med Innovasjonsrammen er å stimulera klyngebedriftene til å samarbeida om å utvikla idear om nye innovasjonsprosjekt. Dette kan omfatta innovasjonar knytt til produkt, tenester, produksjonsprosessar, forretningsmodellar eller marknader. Støtta frå Innovasjonsrammen skal gå til såkalla tidlegfase-prosjekt, og bidra til å utvikla ein prosjektide fram til eit prosjektforslag som er modent nok til å kunne bli finansiert frå bedriftene sjølv eller med risikofinansiering frå verkemiddelapparatet.
Søknadsfrist 29. september
Det er styret i NCE MCT som vel ut kva prosjekt som skal få støtte, men all rapportering vil skje til Innovasjon Norge. Det vil bli tilbydd maksimalt 50 % støtte til kvart prosjekt.
Om du ynskjer å søka midlar, kan du ta kontakt med klyngeteamet for vidare rettleiing. Søknadsfrist er 29. september, og søknadane vil bli handsama på neste styremøte 5. oktober.