Det er om lag 1000 ulike fartøy som dominerer Noregs utslepp frå innanriks skipsfart. Skal me nå våre mål om å oppnå 50 prosent utsleppskutt her innan 2030, må halvparten av desse fartøya erstattast med nullutsleppsfartøy. I gjennomsnitt 50 skip årleg. Tilsvarande skal verdas flåte på over 55 000 skip redusera sine utslepp med 50 prosent innan 2050.

Potensialet for norske leverandørar i den grøne omstillinga er enorme, men me er i dag langt unna å oppfylla dei komande måla. Korleis skal me sikra at produksjon, forsyning og bruk av nye grøne drivstoff kjem på plass? Korleis skal me sikra at verda ser til norskekysten i utviklinga av grøn skipsfart? Kva rammevilkår manglar for næringa? Kva rolle spelar dei viktige vareeigarane? Korleis bør reiarlaga manøvrera i møte med nye drivstoff og forretningsmodellar?

Til debatten kjem klimaministeren som jobbar for å oppfylla handlingsplanen for grøn skipsfart. Her kjem fleire politikarar, næringsaktørar som arbeider med å få opp nye verdikjeder rundt grøne drivstoff, og ikkje minst stiller dei viktige reiarane og vareeigarane.